Մանկապարտեզների քանակի, դրանց հասցեների, սաների և հերթագրված երեխաների թվի մասին բոլոր տվյալները վերցված են Երևանի «Մանկապարտեզ» կառավարման համակարգի պաշտոնական կայքից։

Սաների փաստացի թիվը և հաշվարկային տարողունակությունը ներկայացնելիս ներառվել են միայն գործող մանկապարտեզները։

Վերանորոգման նպատակով փակված մանկապարտեզների վերաբերյալ տեղեկությունը Երևանի «Մանկապարտեզ» կառավարման համակարգի կայքում ներկայացված է տարբեր ձևերով, այդ պատճառով լրացուցիչ ստուգել ենք՝ արդյոք դրանք փակ են վերանորոգման համար։

Վերանորոգման ենթակա մի քանի մանկապարտեզների տվյալներում երևում են որոշակի թվով գրանցված սաներ: Մանկապարտեզների մասին պաշտոնական կայքում նախադպրոցական հաստատություններ հաճախող երեխաների ընդհանուր թիվը ներառում է նաև վերջիններիս, սակայն մեր հաշվարկում նրանց չենք ներառել, , քանի որ նրանք միայն գրանցված են, ոչ թե փաստացի հաճախող։

Բացի մանկապարտեզների ներկայիս տարողունակությունից, մենք ներկայացրել ենք նաև դրանց հաշվարկային տարողունակությունը՝ հիմնվելով գործող խմբերի քանակի և այդ խմբերում երեխաների՝ օրենքով սահմանված թույլատրելի առավելագույն թվի վրա։

24 մանկապարտեզում գործում են տարատարիք խմբեր, որոնց սաների տարիքային միջակայքը կայքում նշված չէր։ Մենք կապ ենք հաստատել նման խմբեր ունեցող մանկապարտեզների հետ, ճշտել տարիքային խումբը, ըստ այդմ որոշել այդտեղ ընդգրկված սաների առավելագույն թիվը։ Այս տվյալները հաշվի են առնվել հաշվարկային տարողունակությունը ներկայացնելիս։

Բացի դրանից՝ ամենաշատ/քիչ ծանրաբեռնված մանկապարտեզները ցույց տալու համար հաշվարկել ենք մանկապարտեզի տարողունակության նկատմամբ հերթի հարաբերակցության ցուցանիշը։ Եթե սաների փաստացի թիվը գերազանցել է հաշվարկային տարողունակությանը, ապա տոկոսը հաշվարկվել է սաների փաստացի թվի նկատմամբ, իսկ հակառակ դեպքում՝ հաշվարկային տարողունակության նկատմամբ։

Վարչական շրջաններում մանկապարտեզների հասանելիությունը համեմատելու համար հաշվել ենք յուրաքանչյուր 1000 բնակչի հաշվով մանկապարտեզներում առկա տեղերի քանակը: Վարչական շրջանների բնակչության թիվը վերցված է 2024 թվականի Հայաստանի ժողովրդագրական ժողովածուից։

Հասանելիությունը գնահատելու համար 1000 բնակչի հաշվով առկա տեղերի ցուցանիշը այդքան էլ կատարյալ պատկեր չի տալիս․ մանկապարտեզներում առկա տեղերի քանակը նախընտրելի կլիներ հաշվարկել նախադպրոցական տարիքի 1000 երեխայի հաշվով, սակայն ՀՀ վիճակագրական կոմիտեն ըստ Երևանի և ըստ վարչական շրջանների նման բացվածք չունի։

Այսպիսով, հիմնվելով 1000 բնակչի հաշվով առկա տեղերի ցուցանիշի վրա՝ կարող ենք տեսնել ամենախնդրահարույց վարչական շրջանները, որտեղ ծանրաբեռնվածությունը մեղմելու համար պահանջվում են հրատապ միջոցներ։

Հաշվիչի տրամադրած տվյալները թարմացվում են յուրաքանչյուր ուրբաթ օրվա երեկոյան՝ հիմնվելով Երևանի «Մանկապարտեզ» կառավարման համակարգի թարմացվող տվյալների վրա։

Հաշվիչն արձանագրում է տվյալ պահին առկա իրավիճակը։ Տարվա ընթացքում առանձին ցուցանիշներ կարող են փոփոխվել, հատկապես ուսումնական տարվա ավարտին և մեկնարկին, սակայն վարչական շրջանների և առանձին մանկապարտեզների տվյալների միջև համեմատությունը կարտացոլի մանկապարտեզների հասանելիության/ծանրաբեռնվածության հիմնական պատկերը։

Հաշվիչը կարող է տեղեկություն տրամադրել Երևանի մանկապարտեզների տարողունակության, սաների թվի, հերթագրված երեխաների քանակի, ծանրաբեռնվածության մասին երեք մակարդակում՝ ամբողջ համայնքում, առանձին վարչական շրջաններում և առանձին մանկապարտեզներում։

Մուտք գործելիս հաշվիչը ցուցադրում է Երևանի մանկապարտեզների ընդհանուր պատկերը։ Սեղմեք «Ընտրել վարչական շրջանը» դաշտի վրա և ցանկից ընտրեք այն վարչական շրջանը, որի մասին տվյալները ցանկանում եք տեսնել։

Եթե ցանկանում եք տեսնել տվյալ վարչական շրջանի առանձին մանկապարտեզի տվյալները, ապա «Ընտրել մանկապարտեզը» դաշտի ցանկից ընտրեք մանկապարտեզի համարը։

Ընտրելուց անմիջապես հետո տվյալները հայտնվում են դեղին դաշտերում, որոնց վրա մկնիկը պահելիս (հեռախոսի դեպքում՝ սեղմելիս) կարող եք տեսնել այդ տվյալի մանրամասն նկարագրությունը։

Եթե ցանկանում եք այլ մանկապարտեզի մասին տվյալ որոնել, կարող եք նույն դաշտից ընտրել ցանկալի մանկապարտեզի համարը կամ սեղմել «Մաքրել ֆիլտրերը» կոճակը և վերադառնալ ընդհանուր պատկերին։

Քարտեզի վրա շրջանակները տեղադրված են ըստ հասցեների։ Կանաչ շրջանակները գործող մանկապարտեզներն են, իսկ կարմիր շրջանակները՝ այս պահին վերանորոգման նպատակով փակ մանկապարտեզները։

Հաշվիչի տրամադրած տվյալները թարմացվում են յուրաքանչյուր ուրբաթ երեկոյան՝ հիմնվելով Երևանի «Մանկապարտեզ» կառավարման համակարգի թարմացվող տվյալների վրա։